亚运限行演练请做足全套

　　亚运期间，广州嘅车辆限行措施会升级，为咗缓解公交、地铁嘅客流，广州打算实施错峰上落班。有专家认为，应该喺第二次限行演练嘅时候，加入呢项措施以摸底错峰上落班对市民出行嘅影响。

　　我觉得呢个意见唔错。因为睇住数据做分析、做方案通常都系睇落去科学，但实施起身就一镬泡。唔经过实际嘅演练，边个够胆拍心口话错峰上落班一定可以平缓早高峰嘅巅峰值、缩短峰值时长呢?更何况第一次演练嘅时候，公交、地铁嘅主力———学生哥重放紧假，冇咗呢个群体嘅出行数据,呢个调研结果点得啊?

　　我认为，第二次演练除咗上面提到嘅，地铁安检程序同样要加入。奥运期间去过北京嘅朋友讲俾我哋知，坐地铁要先安检后入闸，人多嘅时候必定要排队，所以坐地铁比平时会使多咗时间。而对上班族嚟讲，为咗弥补返排队安检嘅时间，都会提早一啲出门。噉样一嚟，好可能就会抵消咗错峰上落班嘅效果。况且亚运期间地铁安检会点样做，市民要使几多时间嚟进行安检，呢啲到目前为止都系“零概念”嘅嘢。所以，有必要考虑将地铁嘅安检加入到演练当中去，以检验其对市民出行嘅影响。

　　为咗亚运期间可以顺顺利利出行，我认为，有关部门安排嘅演练应该考虑多一啲“意外情况”。如果情况允许嘅话，好似应对三号线故障呢种突发情况嘅措施，其实都应该演练一下。俗话讲，做戏要做全套。亚运演练本来就唔系一场戏咁简单，噉系唔系应该做得更全面一啲呢?