回南天 经济实惠除湿大作战(粤语篇)

　　好不幸，天气预报话，今天开始，回南天又返嚟搞搞震了。前几日嘅回南天之时，个个老友都喺微博喊苦喊忽，呢个话衣服唔干冇衫着，嗰个话屋企嘅电视短路，另一个又话瓷砖地板太滑跌衬了。好咗冇几日，咁样嘅日子又返嚟了，乐观如我，都忍唔住抑郁。

　　每年二三月份，广州都会出现回南天，有时仲会持续到四五月份。一到呢个时候，空气鬼死咁潮湿，湿度达到90%以上，门窗、地板、衣柜……到处都係水珠，乜嘢都湿淋淋，非常之影响心情。今次嘅回南天，据预报会持续好多日，大家要做足除湿嘅准备先。

　　除湿效果最好嘅，梗係除湿机了。不过呢件嘢几贵下，最平嘅都要两千蚊，我去家电卖场睇咗两三年，最终都係下唔到决心买，因为除湿机可以用到嘅时间唔长，又占地方，价格又贵，惗嚟惗去，都係用啲平民嘅办法最好。

　　想用悭钱啲办法除湿，我建议最好用生石灰或者木炭，网上大把卖，一斤一般四五蚊鸡，平嘅先至一两蚊一斤，买番几斤回来摆喺墙角，几有效下。不过有BB嘅屋企就要注意安全了，一定要买袋装嘅，同埋摆高滴，唔好俾小朋友攞到。有啲人建议多开窗通风，千祈唔好咁样，宁愿一日到黑唔开窗都好过开窗，因为外面嘅空气比室内仲潮湿。如果想换下室内嘅空气，咁就喺中午、下午之时开两三粒钟嘅窗就好了。係了，仲有家电，一定要每日都开下至得，唔係嘅话好容易短路嘎！